….. Yeh jo zer E ataab haiN saaray…..

Yeh jo zer E ataab haiN saaray
Haamii E inqilaab haiN saaray

Shahr hai jin ke dam se ba rounaq
Hum se khaanaa kharaab haiN saaray

Daam E khush manzari meN qaid ho kyun?
Be waqoofo! saraab haiN saaray

Apne khaaboN ki laash uthaaye haiN
Log jo kaamyaab haiN saaray

Woh gali, woh makaan, woh khiRki
Kach_chi umroN k khaab haiN saaray

Aa kisi din tujhe maiN dikhlaON
Dhukh mere lajawaab haiN saaray

Advertisements

Yeh waqt phir se kisii imtehaan hi ka na ho…

 

Yeh waqt phir se kisii imtehaan hi ka na ho
Aur is me abke zayaaN apni jaan hi ka na ho

Suna hai bazm meN sab ki chhalak paRi aNkhen
KahiiN woh zikr meri daastaan hi ka na ho

Mere qareeb hai tu aur sochtaa huN maiN
K sab tamasha dil E khush gumaan hi ka na ho

Har ek lamhaa ise kori manziloN ki lagan
Ajeeb sar hai kabhi saaibaan hi ka na ho

Har ek sitam pe yeh imkan paalte rahna
K is me haath kisii mehrbaan hi ka na ho

Bas ek khyaal se dil khauf khane lagta hai
Sitam zareef mere khaandaan hi ka na ho

Ek sitaaraa sa badan dhyan me hai….

Ek sitaaraa sa badan dhyan me hai
Ek dil aawez sadaa kaan me hai

Hijr ki raat me kuchh neend bhi ho
Wasl ka khaab to imkaan me hai

Zindagi tujh se muzaiyyan thi kabhi
Ab to shayad ye bayaabaan me hai

Teri sairaabi – e – jaaN par laa’nat
Jo mere qatl ke aelaan me hai

Tujh ko paaye hue muddat guzri
Phir talab kya dil e naadaan me hai

Gham k maaroN ka pata kaun kare
Shahr tera hai, tere dhyaan me hai

Tum pe kuchh meri dastars hi nahin…..

 

Tum pe kuchh meri dastars hi nahin
Naa -um- midee meri abas hi nahin.

Hum diwaane ye soch ke khush hain
Rooh ke waaste qafas hi nahin !!

Saa’d ki khaamiyaan bhi haasil hain
Paas mere faqat nahas hi nahin.

Haakim e shahr khubiyun se pur
per wo naadaan khudaa taras hi nahin

Aao aankhen hi rehn rakhwaaden
khaab per jab hamara bas hi nahin

Teer mera na kamaan hai meri…

 

Teer mera na kamaan hai meri
Koi pahchaan kahaan hai meri

Dekhta hun main khuli ankh se khab
Aur sheeshe ki dukaan hai meri !!!

Too zara dhyaan barat mere liye
Zindagi tujh men nihaan hai meri

Sue maqtal hi nikalnaa hogaa
Ab wohi jaaye amaan hai meri

Hai mujhe saari haqiqat malum
Is liye band zabaan hai meri

Meri muththi men hai iski ungli
Zindagi se bhali maan hai meri

Meri haalat pe meraa ghar roye…

 

Meri haalat pe meraa ghar roye
Zara baarish ho k chappar roye

Is qadar tut ke chaaha bhi na tha
Jitna hum unse bichhar ke roye

Main to hansne ka maza lun lekin
Kaun hai jo mere ander roye

Door tak saath chali aayi thi
Teri aawaaz ko chhukar roye

Khelti nadyon ko maalum kahan
Un ki takhleeq pe patthar roye

Apne ash’aar pe naqqad hanse
Aur hum unki samajh per roye

Khushbu, titli, phool, phuwaar – us chehre ke naam….

 

Khushbu, titli, phool, phuwaar – us chehre ke naam
Mausam ke saare singaar – us chehre ke naam

Mere liye hain dukh me doobe, registaani geet
Dosheezaaon ki malhaar – us chehre ke naam

Hai pagal maujon se larna hi meri taqdeer
Saahil, kashti aur patwaar – us chehre ke naam

Saare phul sajate hain bas uski komal sej
Bela, juhi, haar singhaar – us chehre ke naam

Meri aankhon me chhayi hai mahroomi ki dhundh
Khushhaali ke sab aasaar – us chehre ke naam

Main awara beghar larkaa, kab tak chhaanun khak
Karde mujh ko palanhaar – us chehre ke naam