Ahmad Faraz Ghazal

Is se pahale ke be-vafaa ho jaayeN….

 

Is se pahale ke be-vafaa ho jaayeN
KyuN na ae dost ham judaa ho jaayeN

Tuu bhii hiire se ban gayaa pat_thar
Ham bhii kal jane kya se kya ho jaayeN

Tuu ke  yakta tha, be-shumar hooa
Ham bhii tooteN to jabaja ho jaayeN

Ham bhii majbuuriyoN ka uzr kareN
Aur kahiiN aur mubtalaa ho jaayeN

Ham agar manzileN naa ban paayeN
ManziloN tak kaa raastaa ho jaayeN!!

Dair say soch meiN haiN parwaanay
Rakh ho jaayeN, ya hawaa ho jaayeN

Ishq bhii khel hai nasiibo.n kaa
Khaak ho jaaye.n kimiyaa ho jaaye.n

Ab ke gar tuu mile to ham tujh se
Aise lipTeN terii qabaa ho jaayeN

Bandagii ham ne chhoR dii hai ‘Faraz’
Kyaa kareN log jab Khudaa ho jaayeN

Tujhse bichhaR ke ham bhii muqaddar ke ho gaye…

Tujhse bichhaR ke ham bhii muqaddar ke ho gaye
Phir jo bhii dar mila hai usii dar ke ho gaye

Phir yuN huaa ke Ghair ko dil se lagaa liyaa
Andar vo nafrateN thiiN ke baahar ke ho gaye

Kyaa log the ke jaan se baRh kar aziiz the
Ab dil se mahv naam bhii aksar ke ho gaye

Ai yaad-e-yaar tujh se kareN kyaa shikaayateN
Ai dard-E-hijr hum bhii to pat_thar ke ho gaye

Samjhaa rahe the mujh ko sabhii nasehaan-E-shahr
Phir raftaa raftaa Khud usii kaafir ke ho gaye

Ab ke na intizaar kareN chaaragar kaa ham
Ab ke gaye to kuu-E-sitamgar ke ho gaye

Rote ho ek jaziira-E-jaaN ko “Faraz” tum
Dekho to kitne shahr samandar ke ho gaye

Kahaniyan na suno aas paas logoN Ki…

 

Kahaniyan na suno aas paas logoN Ki
Ke mera shaher hai basti udaas logoN Ki

Na koi samt na manzil so Qaafila kaisa
RawaaN hai bheeR faqat be-Qayas logoN Ki

Kisi se pooch hi lete wafa ke baab meN hum
Kami nahiN thi zamaanaa-shanaas logoN Ki

MuhabbatoN ka safar khatm to nahiN hota
Baja K dosti aayi na raas logoN Ki

HamaiN bhi apne Kayi dost yaad aate haiN
Kabhi jo baat chale na-sipaas logoN Ki

Karo na apni bala-noshion Ke yuun charchay
K is se aur bhi barhti hai pyaas logoN Ki

MaiN aany wale ZamaanoN se dar raha huN ‘Faraz’
K maiN ne dekhi haiN aaNkheN udaas logoN Ki

Nazar bujhi to karishmay bhi roz O shab ke gaye…

 

Nazar bujhi to karishmay bhi roz O shab ke gaye
K ab  talak nahi aaye haiN log  jabb ke gaye


Sunegaa koun teri bewafaaiyoN ke  gilay
Yahi hai rasm-E-zamana to ham bhi ab ke gaye


Magar kissi ne hamaiN ham safar nahi jaanaa
Yeh aur baat K ham saath saath sab ke gaye


Ab aaye ho to yahaaN kya hai dekhnay ke liye
Ye shahr kab se hai weeraN wo log kab ke gaye


Giraftaa dil thay,  magar houslaa na haaraa tha
Giraftaa dil haiN magar housslay bhi ab ke gaye


Tum apni shamm’a tamanna ko ro rahe ho ‘Faraz’
In aaNdhiyoN meN to pyare charaGh sab ke gaye

Tujhe hai Mashq E Sitam ka Malaal waise hi…

 

Tujhe hai Mashq E Sitam ka Malaal waise hi
Humaari Jaan hai, JaaN par wabaal waise hi


Chala Tha Zikr Zmaane ki Bewafaayi ka
So aa gaya hai tumhara Khayal waise hi


Hum aa gaye haiN Tah E Daam to Nasib apna
Wagarna usne to phenka tha Jaal waise hi


MaiN rokna hi nahin chahta tha Waar uska
Giri nahin Mere Haathon se Dhaal waise hi


Zamaana humse bhala Dushmani to kya rakhta
So kar gaya hai humaiN Paayemaal waise hi


Mujhe bhi ShouQ na tha DaastaaN sunane ka
‘Faraz’ usne bhi poocha tha Haal waise hi


Ajab junoon E musafat meN ghar se nikla tha…

 

Ajab junoon E musafat meN ghar se nikla tha
Khabar nahiN hia K suraj kidhar se nikla tha


Ye kaun phir se unhiN raastoN meN chhoR gaya
Abhi abhi to azaab E safar se nikla tha


Yeh teer dil meN magar be sabab nahi utraa
Koi to harf lab E chaaraagar se nikla tha


Yeh ab jo aag bana shahr shahr phaila hai
Yahi dhuaaN mere deewar O dar se nikla tha


MaiN raat toot k royaa to chain se soyaa
K dil ka zahr mere chashm E tar se nikla tha


Ye ab jo sar haiN Khamidaa, kulaah ki khatir
Ye aib bhi to hum ahl E hunar se nikla tha


Wo Qais ab jise majnuN pukaarte haiN ‘Faraz’
Teri tarah koi deewaanaa ghar se nikla tha